Saturday 25th November 2017

 

सौराहामा ‘पर्यटन गुरुयोजना’

रत्ननगर (चितवन), ४ वैशाख । नेपालकै तेस्रो पर्यटकीय नगरी चितवनको सौराहामा पर्यटन व्यवसाय सुरु भएको तीन दशकपछि बल्ल ‘पर्यटन गुरुयोजना’ निर्माण गर्न थालिएको छ ।

क्षेत्रीय होटल सङ्घका महासचिव राममणि खनालले गुरुयोजनाका लागि बजेट विनियोजन भएकाले आवश्यक प्रक्रिया सुरु भएको जानकारी दिनुभयो ।

उहाँका अनुसार विभिन्न क्षेत्रबाट गुरुयोजनाका लागि करिब रु १८ लाख रकम आएकाले जिल्लाकै समग्र पर्यटन क्षेत्रलाई जोड्ने गरी पर्यटकीय पूर्वाधार निर्माण, वन्यजन्तु र वातावरण संरक्षण, तालतलैया निर्माण, प्रचारप्रसार तथा सम्मेलन केन्द्र, संस्कृति संरक्षणलगायत आवश्यक भौतिक निर्माणलाई प्राथमिकतामा राखेर गुरुयोजना बनाइनेछ ।

गुरुयोजना निर्माणका लागि पर्यटन विभागबाट रु दुई लाख ५० हजार, रत्ननगर नगरपालिकाबाट रु पाँच लाख, संस्कृति तथा पर्यटन मन्त्रालयबाट रु पाँच लाख र क्षेत्रीय होटल सङ्घले व्यहोर्ने गरी करिब रु पाँच लाख बजेट विनियोजन भएको महासचिव खनालले जानकारी दिनुभयो ।

विसं २०३० मा चितवन राष्ट्रिय निकुञ्ज स्थापना भएपछि २०३२ सालमा पर्यटन सम्बन्धी गतिविधि सौराहामा सुरु भएको पाइन्छ ।

विसं २०३७÷३८ तिर भने पर्यटन व्यवसाय नै सुरु भएको क्षेत्रीय होटल सङ्घका अध्यक्ष सुमन घिमिरे बताउनुहुन्छ । विसं २०४२ बाट भने व्यावसायिक रुपमा थालिएको पर्यटन व्यवसाय फस्टाउँदै गएको थियो ।

अहिले सौराहामा ११० भन्दा बढी सुविधायुक्त होटल बनेका छन् । झन्डै ६० वटा रेस्टुरेन्ट रहेको क्षेत्रीय रेवानका अध्यक्ष लालबहादुर भट्ट बताउनुहुन्छ ।

दैनिक सौराहामा दुई हजार ८०० पर्यटक बस्ने क्षमता छ । यहाँ आउने पर्यटक जङ्गल सफारी गरेर वन्यजन्तु अवलोकमा रमाउँछन् ।

चितवनमा ४० पर्यटकीय गन्तव्यको पहिचान भएको चितवन पर्यटन विकास समितिका महासचिव, विश्व सुवेदीले जानकारी दिनुभयो । रासस

Published at: April 17, 2017 1:26 pm

तपाईंको प्रतिकृया जनाउनुहोस्

Loading...

अरु समाचारहरु

ताजा समाचार

Exchange Rate

Nepali Patro