महिला हिंसाविरुद्ध निःशुल्क हेल्पलाइन ११४५ शुरु

admin
प्रकाशित मिति: २४ मंसिर २०७४, आईतवार १६:३३

राष्ट्रिय महिला आयोगले लैंगिक हिंसा अन्त्य गर्न सहयोग पु¥याउने उद्देश्यले ११४५ नम्बरको निःशुल्क हेल्पलाइन प्रारम्भ गरेको छ । यो हेल्पलाइन २४सै घण्टा सञ्चालनमा रहने छ ।

सोह्र दिने महिला हिंसा विरुद्धको अभियान समापनका अवसरमा आज सो हेल्पलाइन महिला, बालबालिका तथा समाजकल्याण मन्त्री विक्रमबहादुर थापाले शुभारम्भ गर्नुभएको हो ।

उहाँले महिलामाथि हुने सबै प्रकारका हिंसा न्यूनीकरणका लागि सरकार सधैँ प्रतिबद्ध रहेको चर्चा गर्दै निःशुल्क हेल्पलाइन ११४५ ले पनि यस्ता घटना न्यूनीकरणमा सहयोग पुग्ने विश्वास व्यक्त गर्नुभयो ।

महिला हिंसा अन्त्यका लागि १६ दिने औपचारिक कार्यक्रममा मात्र केन्द्रित नभई नगरपालिका, गाउँपालिका र वडा–वडामा यस्ता कार्यक्रम सञ्चालन गरी चेतना जगाउनुपर्नेमा मन्त्री थापाले जोड दिनुभयो ।

राष्ट्रिय मानवअधिकार आयोगका प्रवक्ता मोहना अन्सारीले महिला हिंसा अन्त्यका लागि सबै एकताबद्ध हुनुपर्ने र त्यसका लागि महिला सहभागिता बढाउनुपर्ने आवश्यकता आँैल्याउनुभयो ।
Related image
सर्वोच्च अदालतका न्यायाधीश सपना मल्ल प्रधानले महिला हिंसा अन्त्यका लागि महिलाको सम्पत्तिमाथिको अधिकार, शिक्षाजस्ता विषयमा प्राथमिकता दिनुपर्ने बताउनुभयो ।

महिला, बालबालिका तथा समाज कल्याण मन्त्रालयका सहसचिव राधिका अर्यालले ऐन निर्माण गरेर महिला हिंसा अन्त्य गर्ने प्रयास भइरहेको जानकारी दिनुभयो ।

महिला अधिकारकर्मी चाँदनी जोशीले आफूले ५० वर्षदेखि महिला हिंसाविरुद्ध आवाज उठाउँदै र महिला सशक्तीकरणमा निरन्तर लागिरहने बताउनुभयो ।

विगत १२ महिनाको अवधिमा लैंगिक हिंसा भोगेकामध्ये ९६ प्रतिशत पीडित महिलाले विवाह, दशँै, मेला र पर्वका बेलामा हुने बताएको आयोगको तथ्यांकमा उल्लेख छ ।


२४ मंसिर २०७४, आईतवार १६:३३ मा प्रकाशित

तपाईंको प्रतिकृया जनाउनुहोस्