इस्कुस बिक्रीबाट आम्दानी

admin
प्रकाशित मिति: २० आश्विन २०७५, शनिबार १५:२८

गाईघाट उदयपुर, २० असोज (रासस) : उदयपुर जिल्लाको रौतामाई गाउँपालिकाको रौता, सल्ले तथा त्रियुगा नगरपालिका–१४ साउने खाँबु पहाडी क्षेत्रका कृषकले अहिले आफूहरुले उत्पादन गरेको इस्कुस, करेला बिक्री गरेर राम्रो आर्थिक आम्दानी लिन शुरु गरेका छन् । भदौको पहिले हप्ता लागेसँगै आफूले उत्पादन गरेको इस्कुस बिक्री गर्न शुरु गरेका खाँबुका स्थानीयवासी हीराबहादुर मगरले एक महिनाभित्रै रु ६० हजारबराबरको इस्कुस बिक्री गरिसकेको मगर बताउनुहुनछ । त्रियुगा नगरपालिका–१४ साउनेका रेखबहादुर सिंजाली मगरले पनि भदौको दोस्रो हप्तादेखि आफूले उत्पादित इस्कुस बिक्री गरेर अहिलेसम्ममा रु ४० हजार बराबरको इस्कुस बिक्री गरिसकेको रेखबहादुर बताउनुहुन्छ । रेखबहादुर भन्नुहुन्छ,“ दशैँं तिहार जस्तो चाड नजिकै आउँदै छ, यही इस्कुस बिक्री गरेर आफूले दशैँंैं खर्च व्यवस्थापन गर्नुपर्ने र घरका नानीको लागि केही पढाइ खर्च धान्नुपर्ने बाध्यता रहेको छ, इस्कुस उत्पादनसँगै अहिले बिक्री शुरु भएर राम्रो आम्दानी हुन थालेका कारण दशैँं खर्च र नानीको पढाइ खर्च धान्ने योजनामा छु ।”

वर्षेनी इस्कुस उत्पादनबाट राम्रो आर्थिक आम्दानी गरेर घरखर्च धान्दै आएका यस क्षेत्रका कृषकले यसपटक पनि दशैँं नजिकै आउन लागेसँगै इस्कुस बिक्री पनि बढ्दै गएका कारण बिक्रीबाट दशैँं तिहारको खर्च धान्ने पक्षमा आफू रहेको इस्कुुस उत्पादक कृषक बताउनुहुन्छ् । यसक्षेत्रको भौगोलिक बनावट नै पाखा भिरालो जग्गा रहेको र अन्य अन्नबाली धेरै उत्पादन नभए पनि जिल्लाको रौता क्षेत्र, साउने खाँबु क्षेत्र परिचित हुँदै आएको खाँबु डहरका शिक्षक जीतमान राई बताउनुहुन्छ । यहाँ उत्पादन हुने इस्कुस अहिले जिल्लाको सदरमुकाम गाईघाट हुँदै सिरहाको लहान, सप्तरीको राजविराज, सिरहा बजारसम्म पैठारी हुने गरेको रौता चिसापानीका शिवप्रसाद काफ्लेको भनाइ छ । यातायातको सुविधा गाउँ–गाउँसम्म पुगेपछि इस्कुस खरीद गर्न सिरहा, सप्तरी जिल्लाको सदमुकाम गाईघाटदेखि तरकारी व्यापारी गाउँको घर–घर गाडी लिएर आउने गरेपछि अहिले यस क्षेत्रमा उत्पादित इस्कुसले बिक्रीको लागि राम्रो बजार पाएको रौता बोलुङखाका हर्कशेर राई बताउनुहुन्छ । खाँबुका खम्बबहादुर मगरका अनुसार यस क्षेत्रमा अहिले सेतो इस्कुस, ठूलो काँढे इस्कुस र साना घरेलु प्रजातिका इस्कुस उत्पादन हुँदै आएका छन् । गाउँमा सडक पुग्नु, इस्कुसको उत्पादन राम्रो हुनु र इस्कुसले राम्रो बजार पाउने गरेका कारण यस क्षेत्रका कृषकले इस्कुस बिक्रीबाट वर्षेनी राम्रो आर्थिक आम्दानी गर्ने गरेको स्वयं इस्कुस उत्पादक कृषक बताउँछन् । अहिले इस्कुसको उत्पादन पछि बिक्रीको सिजन शुरु भएसँगै यसक्षेत्रका इस्कुस उत्पादक कृषकले इस्कुस बिक्री गरेर राम्रो आर्थिक आम्दानी लिन समेत शुरु गरेका छन् ।


२० आश्विन २०७५, शनिबार १५:२८ मा प्रकाशित

तपाईंको प्रतिकृया जनाउनुहोस्