राष्ट्रिय स्वतन्त्र पार्टी(रास्वपा) संसदीय दलका उपनेता गणेश पराजुलीले वर्तमान सरकार गठन भएपछि सुशासन र सेवा प्रवाहमा सुधार देखिएको दावी गर्नुभएको छ ।
बिहीबार प्रतिनिधिसभा बैठकमा उपनेता पराजुलीले सुशासनको जग बलियो बनाउन र समृद्धिको सपना पुरा गर्न वर्तमान सरकार र रास्वपाले निरन्तर प्रयास गरिरहेको समेत बताउनुभयो ।
उहाँले सरुवा– बढुवामा डिजिटल प्रणाली, राहदानी र लाइसेन्स घरमै पु¥याउने सेवा, भूमि प्रशासनको विस्तार तथा भूमिहीन परिवारलाई लालपूर्जा वितरण जस्ता सुशासनका सुधारहरू सुरु भएको उल्लेख गर्नुभयो । बिचौलिया र घुसखोरीको अन्त्य गर्दै नागरिकले बिना भनसुन र बिना घुस समयमै सेवा पाउने वातावरण निर्माण गर्न सरकार प्रतिबद्ध रहेको उहाँले बताउनुभयो ।
पराजुलीले जोखिममा रहेका नागरिकको जीवन जोगाउने, प्रभावित परिवारलाई समयमै सहायता पु¥याउने र अवरुद्ध जनजीवनलाई यथाशीघ्र सामान्य बनाउने कार्यमा सरकार थप स्पष्ट हुनुपर्ने धारणा राख्नुभयो । विपद्मा सरकार र प्रतिपक्ष नछुट्याई सबैले सहकार्य र रचनात्मक योगदान गर्नुपर्ने साझा दायित्व भएको उहाँको भनाइ छ ।
उहाँले नेपालले विश्वमञ्चमा उठाएको जलवायु न्यायको आवाजलाई प्रभावित क्षेत्रका नागरिकको सुरक्षा, सहारा र समग्र पर्यावरण संरक्षणमा रूपान्तरण गरिनुपर्ने उल्लेख गर्नुभयो । हिमालयको संरक्षणलाई केवल नेपालको भूगोलमा सीमित नराखी साझा अन्तर्राष्ट्रिय जिम्मेवारीका रूपमा स्थापित गर्न नेपालले निरन्तर पहल गर्नुपर्ने उहाँको भनाइ छ ।
