सुदर्शन बजगाई,आशाका किरण समाचार । नेपाल स्काउटका प्रमुख स्काउट एवम् नेपाल सरकारका युवा तथा खेलकुद मन्त्री डिग बहादुर लिम्बूको दिक्षान्त समारोह नेपाल स्काउटको राष्ट्रिय प्रधान कार्यालय लैनचौरमा सम्पन्न भएको छ । आज एक समारोहकाबिच नेपाल स्काउटका राष्ट्रिय तदर्थ समितिका संयोजक लोक बहादुर भण्डारीले युवा तथा खेलकुद मन्त्रीलाई स्काउटको दीक्षा गराएका हुन् ।
ऐन अनुसार युवा तथा खेलकुद मन्त्री प्रमुख स्काउट हुने व्यवस्था छ ।
राष्ट्रिय परिषद सदस्य युवा मन्त्रालयका सचिव सुर्यप्रसाद गौतमलाई समेत कार्यक्रममा दीक्षित गरिएको थियो ।
कार्यक्रममा नेपाल स्काउटका राष्ट्रिय तदर्थ समितिका संयोजक लोक बहादुर भण्डारीले नेपाल स्काउटको आफ्नो कार्यकालको फेरिस्ता प्रस्तुत गरेका थिए ।
कार्यक्रममा बोल्दै युवा तथा खेलकुद मन्त्री डिग बहादुर लिम्बुले नेपाल स्काउटमा आफुपनी जोडिए मौका पाएको र एक घर एक स्काउट पुर्याउने अभियानमा मन्त्रालयको तर्फबाट सक्दो सहयोग गर्ने बताए ।
स्काउटलाई स्कुलमा मात्र नभई विश्वविद्यालयमा समेत विस्तार गर्न सरकारको निति तथा कार्यक्रममा समाबेश गर्न आफू लागिपरेको प्रमुख स्काउट समेत रहेका लिम्बुले बताए ।
कार्यक्रम संचालन नेपाल स्काउटका निर्देशक राम प्रसाद भट्टराईले गरेका थिए भने कार्यक्रममा युवा तथा खेलकुद मन्त्रालयका सचिव एवम् स्काउटका राष्ट्रिय परिषद् सदस्य सुर्यप्रसाद गौतमले समेत मन्तव्य राखेका थिए ।
