नेपाली काङ्ग्रेसका सभापति गगन कुमार थापाले सरकार, संसद्, अदालत वा संवैधानिक निकायले गरेका निर्णयहरू जनताको नजरमा प्रमाणित र स्वीकार्य हुनुपर्ने बताउनुभएको छ ।
नन्दप्रसाद जानुका फाउण्डेसनले बिहीबार काठमाडौंमा आयोजना गरेको दोलखाका लोकनायकहरु पुस्तक विमोचन कार्यक्रममा सभापति थापाले सरकार, संसद्, अदालत वा संवैधानिक निकायले गरेका निर्णयहरू केवल कानुनसम्मत भएर मात्र नपुग्ने भन्दै तिनको औचित्य जनताको नजरमा प्रमाणित र स्वीकार्य हुनुपर्ने बताउनुभएको हो ।उहाँले अहिले चुनाव जितेर संसदम पुगेका सांसदमा दम्भ देखिएकाले चुनाव जितेर संसद् छिर्दैमा ’जे बोले पनि वा जे गरे पनि हुन्छ’ भन्ने दम्भ त्याग्नुपर्ने बताउनुभयो । संसद्मा प्राप्त १ मिनेटको शून्य समयमा बोल्दा समेत सांसदहरूले गम्भीर तयारी, सचेतता र पूर्ण जिम्मेवारीका साथ शब्द चयन गर्नुपर्ने उहाँको भनाइ छ । उहाँले विगतमा काङ्ग्रेसएमाले वा तत्कालीन नेकपासँग भएको दुई तिहाइको शक्ति जनताको असन्तुष्टिका कारण कसरी समाप्त भयो भन्ने इतिहासबाट पाठ सिक्नुपर्ने धारणा राख्नुभयो ।
साथै उहाँले नयाँ उदाएका राजनीतिक दलहरूले विगतका गल्तीहरू नदोहोर्याई आफ्ना कमजोरी सच्याएर अघि बढ्नुपर्नेमा जोड दिनुभयो । मुलुकले अब थप कुनै ’राजनीतिक दुस्साहस’ थेग्न नसक्ने भएकाले पाँच वर्षको कार्यकाललाई रचनात्मक र व्यवस्थित बनाउनुपर्ने उहाँको भनाइ छ ।
